القطه العميا

الدور علىَّ

أربط عنيّه

ويا العيال فوق السطوح ... المغربيه

واحاول امسك أى حد فى سكتى

ما امسكش غير حبة هوا

وعفار جدار بكفوف إديه

واضحك وهما يهيَّصوا ويفرحوا

ويروحوا بعد التعب

لكن أنا ...

قررت تفضل لعبتى

عدت سنين ...

وانا لسه بالعب لعبتى

واللعبه عشقت دنيتى

عشقت عيونى مغمضين

باحاول امسك أى حاجه

باحاول اوصل للقمر

ألمس شجر

أحضن قدر

أو ينفتح جوايا باب

أو بس اطول غير التراب

صوت العيال روَّح وزود وحدتى

أخدوا معاهم ضحكتى

كل اللى لعبوا اللعبه ديّه فتحوا

والليل بيخلق ألف شمس تروحه

وانا مستمر فى لعبتى
.........................
موقعى الشخصى على الانترنت رابط
http://www.hossamelokdah.blogspot.com/

المصدر: الموقع الشخصى للشاعر حسام العقدة : http://hosaam2.blogspot.com/2010/10/blog-post_8551.html
  • Currently 0/5 Stars.
  • 1 2 3 4 5
0 تصويتات / 182 مشاهدة

ساحة النقاش

عدد زيارات الموقع

11,844