بسم الله الرحمن الرحيم وبه نستعين والصلاة والسلام على اشرف المرسلين سيدنا وحبيبنا وعظيمنا اشرف الخلق اجمعين محمد رسول الله وعلى اله واصحابة اجمعين .
اما بعد

فاننى انصح كل المتخصصين فى الاطلاع على التحكيم الدولى نظراً لاهميته وذلك لانه كما يقولون – التحكيم الدولى هو منجم دهب لمن يعرف طريقه.

وانا ككل المتخصصيين اطمح فى ان اعرف طريق ذلك المنجم ولاننى لست انانياً فانا قررت البحث فى موضوع التحكيم الدولى وسأعد كل فترة موضوع فى التحكيم الدولى وقررت ان اضع فى الموقع قسماً خاصاً بموضوع التحكيم الدولى على ان يكون ذلك القسم متجدد لذلك اتمنى من جميع المتخصصين ان يتابعونا  يومياً ليطلعوا على ما نقدمه وارجو ان تقدروا المجهود كما ارجو ان تعذرونى عما يظهر من تقصير او نقص والله ولى التوفيق.

اهمية دراسة التحكيم الولى بالنسبة للمتخصصين كما قولنا سابقا فان مجال التحكيم الدولى منجم ذهب لمن يعرف طريقه كما ان تلك الدراسة تفتح الفرص امام الجميع للعمل بالداخل او الخارج .

 
 نبذة عن التحكيم الدولى وملاحظات علي

أولا: تأسيس المركز.....
تأسس مركز التحكيم الدولي عام 2004 وهو عضو باتحاد المحامين الأفريــقي و الــدولـي بـلائـحـــة معتمدة من وزارة العدل المصرية لتلبية احتياجات و ضروريات هامة تقتضيها الظروف و المتطلبات المحلية و الدولــيـة المعاصرة و مواكبته عصر العولمة لسرعة انجاز الفصل في المنازعات التجارية و المدنية باللجوء إلي مـــركز التحكيم الدولي بجمهورية مصرالعربية بدلا من مراكز التحكيم الاجنبية وذلك للتشجيع وجذب الأستــثمار الأجــنـبـي لمصرنا الغالية علي أن تراعي كافة الوزارات والهيئات العامة وشركات القطاع العام وضع شــــــــرط ومشارطة التحكيم أمام مركز التحكيم الدولي في كافة العقود التي تبرم بينها و بين طرف أخر.

و المركز من المؤسسين للاتحاد العربي لمراكز التــحكيــــم الهندسي و الذي يضم 25 مركزاً للتحكيم علي مستوي 20 دولة عربية .

ثالثاً: مكانة مركز التحكيم الدولي

1.    احد المؤسسين للاتحاد العربي لمراكز التحكيم الهندســي.

2.    لائحته معتمدة من وزارة العدل بجمهورية مصر العربية

3.    عضو اعتباري بالاتحاد الدولي للمحــامــيـــن بفرنــســـا

4.    عضو اعتباري باتحاد المحامين الأفارقـــة

 

 

 

النشاط العلمي لمركز التحكيم الدولي

عقد الدورات التمهيدية والتخصصية لإعداد المحكمين العرب الدوليين يمنح الحاصل علي الدورتين هويـــة بــصـفــة مستشار في مجال تخصصه ومحكم معتمد لدي المركز  

عقد أربع دورات تمهيدية وعامة وتخصصية ومتعمقة للحصول علي دبلوم مهني في التحكيم معتمد من مركز حقوق عين شمس للتحكيم بجامعة عين شمس                                      
عقد ترمات في التحكيم للحصول علي دبلوم الدراسات العليا في التحكيم و الماجيستير ودرجة الدكتوراه في التحكيم من كلية الحقوق جامعة المنوفية ومن كلية الحقوق جامعة طنطا .
سادسا : إعداد قوائم المحكمين الدوليين ...
إعـداد الــقــوائـم لإدارج الــمحــكمـــين الــمــعتمـدين لدي المــركز تمهيــداّ لاعتمـادهم من وزارة الـعـــدل المـــــصرية           .
 منح عضوية مركز التحكيم الدولي بلقب مستشار في مجال تخصصه في التحكيم وفقاّ لضوابط الواردة بلائحة المركز       .

منح عضوية الاتحاد الدولي للمحامين واتحاد المحامين الافريقي        .


يعنى أيه تحكيم؟                                                                   



يعنى أيه تحكيم ؟؟؟

يعنى أيه محكم دولى ؟؟؟؟

يعنى أيه الموضوع ده أصلا ؟؟؟؟

قعدة عرب يعنى ؟؟؟؟؟

طب أيه الفرق بينهم – قعدة العرب وحكم التحكيم ؟؟؟

وأسئلة كتير محتاجة جواب شافى وسهل وبدون تفاصيل دقيقة أو تعقيدات قانونية                
أسئلة بديهية تدور غالبا فى ذهن المواطن العادى الغير متخصص ، والمثير فى الأمر أن كثيرا منهم يرتبط فى ذهنه لفظ التحكيم الدولى بالرياضة يعنى ( حكم دولى لماتش كرة قدم ) هو ده التحكيم اللى الناس كلها تعرفه

وعلشان نوضح الموضـوع بتاعنا ونشاطنا هنشرح لك الفكرة بالبلدى وببساطة شديدة ، سمعت عن حاجة اسمها ( مخبر خاص ) فى الدول الأوربية ؟؟؟ يعنى بديل لرجل الشرطة السرى الرسمى 00 ؟؟؟؟ إيه وصلت كده !!!!
أهو إحنا نفس الفكرة ( محكم ) يعنى قاضى قطاع خاص و ( التحكيم ) يعنى محكمة خاصة ( (قطاع خاص غير حكومية ) ولكنها رسمية و زى المحكمة القضائية العادية بالضبط ، بمعنى أن حكم التحكيم الصادر من المحكمة الخاصة دى يعامل نفس معاملة الحكم الصادر من القاضى الطبيعى ، والشرطة تقوم بتنفيذه والمحضرين يقوموا بإجراءات الإعلان والمحكمة القضائية تضع عليه ( الصيغة التنفيذية ) ويتم ختمه بخاتم شعار الجمهورية ، يعنى زيه زى الحكم العادى الصادر من المحكمة العادية بالضبط .
طيب أيه الفرق بين حكم التحكيم وبين حكم القضاء العادى ؟؟؟؟؟

ما فيش فرق غير أن حكم التحكيم أساسه وفكرته ونظامه يقوم على مبدأ سلطان الإرادة، يعنى حسب أتفاق وإرادة ورغبة الخصوم ، عايزين يلجأوا لقاضيهم الطبيعى ( المحكمة القضائية )

 مافيش مشكلة ، عايزين يلجأوا لقضاء التحكيم يبقى لازم يتفقوا كتابة على ذلك من خلال ( شرط مدرج بأحد العقود ) أو من خـــــــلال مشارطة تحكيم –( يعنى عقد أتفاق على اللجوء للتحكيم بخصوص مشكلة أو مشاكل معينة حصلت بالفعل ) وإذا أتفوا على اللجوء للتحكيم صراحة وكتابة بقى ما فيش أمامهم طريق ثانى لحل مشاكلهم اللى اتفقوا على أختصاص التحكيم بها إلا من خلال اللجوء لقضاء التحكيم !!!

بمعنى أنه لو لجأ أحد الأطراف للقضاء العادى بخصوص هذه المشكلة أو العقد اللى سبق أنهم اتفقوا فيه على اللجوء للتحكيم ( مينفعش ) والمحكمة هتحكم بعدم قبول الدعوى لأن فيه أتفاق على التحكيم !!! ومينفعش تروح التحكيم إلا بعد الأتفاق كتابة بين الأطراف على ذلك ، يعنى مينفعش تقرر أنت ده لوحدك !!!
فمثلا لو قرأت أى عقد عادى ستجد فيه فى احد البنود الأخيرة بند ينص على ( تختص محكمة 00000 بالفصل فى أى نزاع ينشأ عن تنفيذ هذا العقد لا قدر الله ) وده بند طبيعى وعادى لتحديد المحكمة المختصة محليا بنظر النزاع أن وجد 0 ، لكن خلى بالك وركز قوى وفتح مخك ، لو لقيت مكان البند ده بند تانى شبيه منه ولكنه ينص على ( اختصاص أحد مراكز التحكيم بالفصل فى النزاع 000 أو مجرد لفظ التحكيم لفض النزاع ) يبقى لازم تركز وتفهم وتدقق وتوافق بأقتناع على الكلام ده ، وإلا أصبحت مضطر وملزم جبرا لحل مشكلتك عن طريق التحكيم دون سواه !!!!
طيب أيهما أفضل اللجوء للتحكيم ولا البقاء على الأصل وهو اللجوء للقاضى الطبيعى العادى ؟؟؟؟؟ الإجابة على السؤال ده بأختيارك أنت وأرادتك الصحيحة المطلقة وعلشان تبقى ليك أرادة صحيحة لازم تفهم الفرق بين القضاءين :
القضاء العادى هو الأصل والأقرب للعدالة ، لكن تكدس القضايا وزيادة أعدادها بهذا الكم الرهيب يجعل قضيتك زيها زى غيرها تاخد دورها وإجراءاتها ويمكن تقعد سنيين وسنيين ويتغير عليها عدة قضاة وتحال للخبراء ثلاث أو أربع مرات وهكذا 0000 ويتحكم فيها فعلا ، لكن الخصم يستأنف الحكم ده وإذا خسره برضه يقوم يطعن عليه بالنقض أو بالألتماس ، ومحكمة النقض محكمة واحدة على مستوى الجمهورية وبتنظر كل طعون المحاكم بجمهورية مصر العربية ، وعلشان كده أحكامها بتتأخر وبتقعد سنين كتير ........
لكن قضاء التحكيم أنت اللى بتختار القاضى بتاعك اللى يمثلك بإرادتك أنت ومن حقك تختار أى حد من أى حتة كمحكم عنك  أحد قضاة التحكيم ) وخصمك بيختار زيك ( المحكم اللى يختاره هو  والأثنين المحكمين دول بيختاروا هما ( الرئيس أو المحكم المرجح اللى يرجح بينهم إذا أختلفوا ) يعنى محكمة التحكيم لازم يكون عددا ) وتر ) يعنى عدد فردى ( 1 – 3 – 5 – 7 – 9 وهكذا ) ولك أن تتخيل انك أنت اللى بتختار القاضى اللى على مزاجك اللى تثق فيه انت ، اللى هيهتم بقضيتك لأنها قضيته الوحيدة ، ولأنه هيتقاضى عنها أجره ، تخيل أنت لو أن محاميك اللى فاهم قضيتك كويس هو اللى بيشارك فى الحكم فيها بالفعل                    !!!!!!
ومن مزايا التحكيم كمان أن القضية لازم تخلص وتنتهى ويحكم فيها خلال سنة واحدة على الأكثر

( 12 شهر كحد أقصى ) يعنى مينفعش تقعد سنتين ثلاثة               !!!!
ومن مزاياه أيضا أن حكم التحكيم غير قابل للطعن عليه لا بالمعارضة ولا بالاستئناف ولا بالنقض يعنى حكم نهائى بات واجب التنفيذ فورا ، وما فيش غير طريق واحد فقط للطعن عليه وهو دعوى البطلان على حكم التحكيم ، وعلى فكرة حتى رفع دعوى البطلان لا يوقف التنفيذ إلا فى حالات استثنائية 0

وفيه مزياه كمان مهمة جدا جدا 0000 الى هى التحكيم بالصلح                       !!!
يعنى أيه التحكيم بالصلح ده كمان ؟

أقولك ياسيدى 0000 القاضى الطبيعى الرسمى بيحكم بالورق وبالقانون بحذافيره ، يعنى لو أنت ليك حق وممعكش ورق يثبته أو القانون مش فى صفك ، يعنى كده حقك راح وعليك العوض والقاضى مش هيقدر يعمل لك حاجة ويخالف الورق اللى أدامه ، حتى لو حس أنك مظلوم
لكن التحكيم بالصلح ده 000 أنت بتفوض المحكم عنك فى أنه من سلطته التقايل على بعض حقوقك ، يعنى يساوم خصمك يسيب له شوية وياخد شوية ( يعنى نص العمى ولا العمى كله ) بقصد الوصول لحل متوازن يرضى جميع الأطراف – يعنى عملية توفيق بين المصالح المتعارضة بالعدل وليس بالقانون

أيه 000 مش فاهم برضه 000 طيب ياسيدى أضرب لك مثلا : أنت ليك عند واحد عشرة جنيه وميعاد سدادهم السنة الجاية شهر يناير ، طيب ممكن تقبل تاخدهم خمسة جنيه بس النهاردة أو ستة جنيه الشهر الجاى ولا تستنى السنة الجاية وتاخدهم كلهم أو السنة اللى بعدها وتاخدهم عشرين بدل عشرة ؟؟؟؟ أهو الصلح ده ممكن يكسبك وممكن يخسرك برضاك وحسب كفاءة المحكم بتاعك اللى أنت أختارته وفوضته فى التحكيم بالصلح 0000 فى أقناع الخصم ورضائه أيضا ، يعنى أنتوا الأثنين مش هتبقوا خصوم ، هتبقوا حبايب زى ما أنتم ومتصالحين ومتسامحين ، ويمكن متحتاجوش لا أحكام ولا أوراق ، هتخلص المشكلة ودى بالصلح و بالتراضى 000 أظن كده فهمت بقى !!!
أهو قاضى المحكمة ميقدرش يعمل كده ولا يقدر يحكم لك بأقل من حقك وفى وقته وميعاده و مقيد بنصوص القانون ، وميقدرش يحكم بأكثر مما يطلبه الخصوم حتى لو ثبت له أنك تستحق أكثر مما طلبت بعريضة دعواك .

طيب التحكيم ده مصاريفه كثيرة شوية 000 مش كده برضه ؟؟؟

أ أقولك آه .... ماهى المستشفى الخاص غالية جدا والمستشفى العام الأميرى ببلاش وقدامك الأثنيين وأختار أنت بمزاجك اللى يعجبك ، لكن لو قارناها بمصاريف المحكمة والخبراء وأتعاب المحامين ولدد الخصومة بين الطرفين وطول الوقت فى التقاضى لحد الحق ما يموت أو ميبقاش له لازمة ، تبقى المسألة قريبة جدا بل ومش غالى بل و أرخص كمان ، أن آخد حقى النهاردة !! مش بعد سنين ، وألاقى أهتمام غير عادى بقضيتى ومصلحتى وبسرعة جدا ، قيمها أنت وأختار ، لأن نظام التحكيم كله مبنى على أختيارك أنت وأتفاقك مع خصمك يعنى من الآخر الموضوع أشبه ما يكون بالبلدى ب ( قعدة العرب ) بس من غير ألزام على حد يعنى المحكوم عليه ممكن ينفذ الحكم اللى تحكم بيه قعدة العرب وممكن مينفذوش وفى الحالة الثانية محدش يقدر يجبره على هذا التنفيذ جبرا عنه ، واللى غالبا ما بيكون فيه حد ضامن يضمن كل طرف أو الطرفين معا ، أو بأيداع كفالة مادية قبل الحكم لضمان تنفيذه أو أحيانا أوراق ذات قيمة زى ( إيصال أمانة أو شيك مثلا ) .
لكن موضوع التحكيم مختلف شوية فلا يشترط أى ضمان للتنفيذ سوى الموافقة الصريحة المكتوبة (على اللجوء للتحكيم من خلال  شرط أو مشارطة تحكيم ) تحرر بين الخصوم ، لأن التحكيم بينظمه ويحكمه قانون ، اللى هو قانون التحكيم فى المواد المدنية والتجارية - المصرى رقم 27 لسنة 1994 ( شوفت أد أية الموضوع قديم ومن زمان ) بس أحنا اللى معندناش فكرة عنه وغير منتشر فى مصر ، مع العلم أن التحكيم ده موجود من زمان قوى قوى فى الشرائع والأديان وأبتدى فى مصر منذ صدور قانون المرافعات القديم عام1968 ثم ألغيت مواد التحكيم الواردة بقانون المرافعات ، وصدر قانون خاص للتحكيم المصرى شاملا كل مسائل التحكيم ونظامه وعلى غرار قانون التحكيم الدولى العالمى والأتفافيات الدولية .

والقانون ده هو اللى بيعطى حكم المحكمين الحجية والقوة التنفيذية له جبرا على المحكوم ضده ، بشرط أن حكم التحكيم يكون صحيح وقائم على أسس وإجراءات صحيحة وسليمة من الناحية القانونية يعنى لازم شيخ العرب اللى يقعد فى قعدة العرب يكون فاهم القانون ده ومستوعبه كويس جدا ، وإلا أصبح هذا الحكم عرضة للطعن عليه بالبطلان لمخالفته أحد نصوص القانون والمحكمة تقضى ببطلانه وكأنه لم يكن ، يعنى ضاع علينا الوقت اللى أحنا محتاجينه والمصاريف والأتعاب اللى أحنا دفعناها ورجعنا إلى حيث أبتدينا !!!!!

وعلى فكرة برضه من مزايا أحكام التحكيم برضه ، أنها أحكام نهائية باتة غير قابلة للطعن عليها بأى مطعن يعنى لا فيها معارضة ولا أستئناف ولا نقض ، وواجبة النفاذ فور صدورها .

طب يمكن الحكم ده فيه حاجة أو حاجات غلط وفيه أجراءات متعملتش !!! الحكم ده يتنفذ غصب عنى وهو غلط كده وملوش معارضة ولا استئناف مش يبقى ده عيب مش ميزة وحرام وظلم ؟؟؟؟

لأ 000 المسألة برضه نظمها القانون أيضا وهى أن الطريق الوحيد للطعن على حكم التحكيم هو الطعن عليه بالبطلان بدعوى مبتدأة أمام القضاء المصرى العادى حسب أختصاصه محليا أو دوليا اللى هى ( محكمة استئناف القاهرة لو كان التحكيم دولى ومحكمة الاستئناف المختصة محليا لو التحكيم محلى ) ، والحكم الصادر فى دعوى البطلان دى هو الوحيد اللى يوقف حكم التحكيم أو يلغيه.