موقع الأستاذ عبد الفتاح أمير عباس أبو زيد

موقع لغوي أدبي تربوي قبمي

كلامى لكل اب مغمض عينيه ..
وبيلف فى ساقية الشغل والبيت والمسئولية
لو تعرف ابنك بيبقى قاعد مستنيك ازاى لغاية ماترجع ..
عمرك ماتتأخر عليه
لو تعرف قلبه بيرقص ازاى لما بتاخده فى حضنك ..
عمرك ماتتعامل معاه من بعيد لبعيد
لو تعرف اد ايه بيبقى نفسه تحطه على رجلك وتلاعبه .. حتى لو كبير ..
عمرك ما تمسك جرنان فى البيت وتسيبه
انت عارف وانت برة بيعمل ايه من وراك ..
بيلبس هدومك ويقف قدام المرايا ..
ويحط رجليه الصغيرة فى جزمتك ويمشى يتكعبل بيهم ..
عشان نفسه يبقى زيك ..
لا دا كمان نفسه يبقى شبهك ..

ولو تعرف بنتك شايفاك ازاى ..
عمرك ماتبخل عليها بوقتك
لو تعرف انها بتحلم تتجوز واحد زيك ..
عمرك ما تتجاهلها عشان تقعد مع اصحابك
جرب كدة تلبس وتتشيك قدامها
هتلاقيها بتعاكسك وتقول لك ..
الله يا بابا شكلك حلو قوى وريحة البرفان جميلة .. انا عايزة واحدة زيها
لو تعرف بتبقى قلقانة عليك ازاى لما بتتأخر ..
عمرك ماترجع من برة على السرير بحجة انك تعبان

جرب كدة تكون قاعد فى البيت .. وامسك كتاب ..
اعمل نفسك بتقرا .. واقعد راقبهم
بص على حركاتهم .. بص على طريقة لعبهم ..
بص عليهم وهم بيتكلموا .. شوف نظرات عينيهم
انا واثق انهم هيصعبوا عليك ..
وهيبقى نفسك تعوضهم حاجات كتير فاتت
انت عارف انت لما بتحضنهم .. انك انت اللى محتاج حضنهم
صدقنى ولادك فيهم طاقة ايجابية غير محدودة
كفيلة انها تسحب كل الطاقة السلبية اللى عندك
صدقنى انت اللى محتاج لهم اكتر ما هم محتاجينك ..
ماتخليش يوم يعدى من غير ماتبوس ولادك
بوسة على الخد اليمين ..
وبوسة على الخد الشمال ..
وبوسة على راسهم من فوق
وانت فى شغلك اطلبهم فى البيت وقول لهم ..
انا باكلمكم بس عشان اسمع صوتكم بس
قول لهم انتو بتوحشونى قوى وانا برة البيت ..
خليهم يشوفوا منك تصرفات مايتوقعوهاش ..
صدقنى بعد شوية .. هيحصل الاتى
هتبقى رايح توصلهم مكان .. وقبل مايسيبوك ..
هتلاقي بدون مقدمات ..
احلى بوسة على خدك اليمين
واجمل بوسة على خدك الشمال ..
وهتلاقى ايد صغيرة بتتحط على راسك .. عشان تنزلها تحت شوية
وادفا بوسة من شفايف ولادك هتتحط على راسك ..
وهتلاقيهم بيقولو لك .. ربنا معاك يا بابا
(انا بيحصل معايا كدة)

هتبقى فى شغلك وفى عز الزحمة ..
هتلاقى بنتك بتكلمك بتقول لك انا باطمن عليك بس
هييجى عيد ميلادك .. هتلاقيهم بيلموا الجنيهات الفضة من حصالاتهم ..
وبيدوهالك تروح تجيب بيهم هدية ليك
ويكتبولك ورق ويلونوه ويرسمولك قلوب

انت عارف انت ايه بالنسبة لهم .. انت بابا
عارف يعنى ايه بابا
بابا يعنى ابنك يقول
"ماحدش يقدر يقرب لى طول ما بابا جنبى"
بابا يعنى بنتك بمنتهى الثقة تقول
"انت عارف لو قلت لبابا انك زعلتنى هيعمل فيك ايه"
بابا يعنى ولادك لو حد قرب منهم يقولوله
"هنجيب لك بابا"
بابا يعنى وانت نايم بالليل تلاقيهم بيتسحبّوا
عشان يناموا جنبك
اب يعنى .. حضن ومسئولية وبيت

صدقنى مش الامومة بس اللى غريزة ..
سيبك من كلام العلماء .. ونظريات الاجتماعيين
سيبك من الدكاترة النفسيين .. والمحللين
انا باقولك .. الأبوّة كمان غريزة وموجودة جواك ..
بس انت اللى سبتهم يضحكو عليك
ويوهموك انها مش جواك
جرب ومش هتندم
ماتداريش حبك وعشقك لولادك .. وتقول انا راجل
ماتكتمش مشاعرك .. دوب فيهم
ولو لقيت نفسك عايز تعيط .. ماتتكسفش تعيط قدامعم
احلى طبطبة فى الدنيا .. هتحس بيها من كف صغير بيحسس على كتفك
هتحس ساعتها انت بجد .. أب

وعلى فكرة الكلام ده مش تأليف
الكلام ده حقيقى جدااااااا

‫#‏منقول‬

amer123123

اللهم احفظ المسلمين من شر وسوء المنافقين والخونة والعملاء والكافرين يارب

  • Currently 0/5 Stars.
  • 1 2 3 4 5
0 تصويتات / 62 مشاهدة
نشرت فى 27 إبريل 2016 بواسطة amer123123

ساحة النقاش

عبد الفتاح أمير عباس أبوذيد

amer123123
موقع لغوي تربوي وأدبي وقيمي الرؤية والرسالة والأهداف: رؤيتنا: الرؤية : الارتقاء بالمنظومة التعليمية والتربوية بما يؤسس لجيل مبدع منتمٍ لوطنه معتزاً بلغته فخوراً بدينه رسالتنا: السعي لتقديم خدمات تربوية وتعليمية ذات جودة عالية بتوظيف التقنية الحديثة ضمن بيئة جاذبة ومحفزة ودافعة للإبداع الأهداف التي نسعى إلى تحقيقها · إعداد »

ابحث

تسجيل الدخول

عدد زيارات الموقع

10,863,452