السلام عليكم ورحمة الله وبركاته

بعدالتحية

اخوتى ... اخواتى فى الله

موضوعى اليوم سأتحدث فيه عن ظاهرة منتشرة ومافيش حد مش متعرض ليها والله ماصادفاتاهش فى حياته.
نقوللكم شنى هيا بالزبط....

.(( ظاهرة الغش فى البضاعة)).

فهمتوا شنى نقصد توة
والله العظيم هالظاهرة هذى انتشرت بشكل رهيب وملفت للنظر وتجدها قريب فى كل مكان ونحب فى هذا المقام ان اتحدث معكم عن بعض هذه المواقف :-

لو تمشى لسوق الخضرة وتبى تشرى طماطم او بطاطا او خضرة او اى شئ وعلى سبيل المثال بتشرى بطاطا يذهلك المنظر لما يعطوك صندوق على اساس بالجملة ولما تجى توزنه تلقاه يعادل كيلو فبالله عليكم شنى الفرق بين كيلو الصندوق والكيلو العادى ممكن الصندوق مصنوع من الذهب هذا ليش غالى وممكن البطاطا اللى فى الصندوق درجة اولى واللى مطروحة درجة ثانية (( يعنى حاجات تصير تخليك تخش فى عقلك )) والمشكلة ايضا تلقاها مالصيف للصيف فى وقت الدلاع او البطيخ تلقى الغش عينى عينك لما تقوله ارشملى هالدلاعة يجى يدور النص الاخضر والنويشط ويرشم منه ويطلع الرشمة على اساس دلاعة مافيش بعدها ، والصدمة لما بو العويلة يروح بالدليليعة للحوش لصغيويرته فتفتحها المراه وتلقاها كوكتيلا نصها طايب والاخر نئ .

حاجة ثانية وخصوصا تصيرفى الملابس تلقى فيه ماركات مايدور فيها حد لأنها معروفة ومالاخير ماتتحملش فيجى صاحب المحل ( هداه الله ) يغير العلامة ويحط مكانها علامة اخرى لشركة عالمية على اساس انتاج مستورد وفى الاغلب تلقاه من بضاعة ((البس مرة وتلف بره )) يعنى بضاعة مشى حالك بمفهومنا الليبى وياريت تلقاها حتى رخيصة بالعكس يبيعوها بأثمان خيالية لجذب الانتباه للزبون الضحية وخصوصا فى الاعياد والمناسبات صايره هلبة مثل هذه الحاجات ويقولك (( الغالى فسومه )) والله من زمان شوية كانوا فيه وحدين يدوروا عالحياش ويشروا فى الملابس القديمة والناس عاد كل واحد دولابه لين فايض مالملابس وفهاذيكا اللحظة يستغنى عن اغلبهم بيش يفضى مكان للملابس الجديدة .... تره قولوا شنى يديروا بيهم ، واضحة وضوح الشمس يمشوا للمغسلة يخيطوا ويحددوا ويطبقوا من جديد ويغلفوا فنايلوات على اساس جديد ويبيعوا وتعالى يلى بتشرى واحتمال كبير جدا تكون انت اول من يشرى البضاعة اللى انت اصلا مصدقها عليهم .

وفيه ظاهرة ثانية مش فى البضاعة لكن الغش فى الزواج وصدقونى صايرة ومازالت تصير خصوصا لما يكون فيه اب عنده بنات وجى عريس حشايمى او يتحشم وطالب ايد بنت من بناته والمشكلة طالب البنت قبل الكبيرة وهنى يجى الغش يتموا كل شئ ومصاريف الفرح والعريس على اساس يبى اللى قبل الكبيرة وتجيه صدمة فى العرس لما يلقاها الكبيرة اللى تزوجها مش اللى قبلها لكن قعد فى حشومات مع اهله والمعازيم فسكت وفوتها زى ماهيا وتوة ليه فترة متزوجها وماشى الحال لكن طباعها جت عكس مامتوقع هوه فرضى بالنصيب وخلاص ومن داخله نادم اشد الندم لأنه لم يراها قبل العرس طبعا بحضور اهلها واهله.

هذه بعض النماذج ومنها ايضا الغش فى العسل وخصوصا الطبيعى منه فالغش فى العسل اصبح شئ لامفر منه خصوصا مع انعدام الثقة ، فنجد مثلا بعض البائعين سامحهم الله يبيعوا فى ماء وسكر محلى على اساس انه عسل ويلصقوا عليه فملصقات على اساس انه طبيعى وهو مش طبيعى والمشكلة الاكبراللى يشرى مسكين تلقاه يبى العسل فى علاج لمرض يعانيه ومايفيده شئ حتى لو كلى منه 10 كيلوا تسألوا ليش لأنه مغشوش مش الطبيعى اللى فيه شفاء للناس.

تلقى ايضا الغش فى الجزارين بين قبل وتوة فيه اختلاف كبير قبل كان كيلوا اللحم يقطعوه وانت واقف وقدامك والميزان مية المية وتاخذ لحم طازة ، لكن توة بدى كله مجمد وسبحان الله حتى الثلج يوزنوا فيه مع اللحم ويقولك خلصنى ، ولما يذوب الثلج فى الحوش طبعا تلقى اللى شريته لحيمات لو توزنهم تلقاهم كيلو الا ربع (( الربع وين مشى ؟؟)) اسأل عقلك تو يقولك. يعنى الغش جهارا نهارا ، وفيه حاجة ثانية وفى الدجاج اكثر شئ شوفوا الغش وين وصل بيهم يضربوا للدجاج فى ايبارى معبيات امية تحت الجلد بيش يبدى يوزن اكثر ولما يختارها الزبون يشريها بضعف حقها اللى المفروض تنشرى بيه وهذا كله مش غش.

الرسول عليه الصلاة والسلام قال (( من غشنا فليس منا )) يعنى ليس من أمة محمد ولايستحق الشفاعة يوم لاينفع مال ولابنون الا من أتى الله بقلب سليم ، يوم تشتد اللهيب الحارقة ولايبقى مايروينا العطش الا حوض النبى لأمة محمد خاصة ويوم يشفع فيه الرسول الكريم لأمته وهو ساجد تحت كرسى العرش فيسأل ربه فيعطيه الشفاعة هو خصيصا دون كل الانبياء فهل ترضى ان لاتكون من أمة محمد شفيع الأمة يوم الدين.

الى هنا انتهى الكلام فى هذا المقام .... واتمنى منكم المشاركة واثراء الحوار فى هذا الموضوع وتسليط الضوء على هذه الظاهرة للرقى بمعيشتنا لمستوى يرضى ربنا ورسوله.

تحياتى ليكم والى الملتقى فى موضوع اخر