شياكة وأناقة.. وحذاء في منتهى البساطة

بنات كتير لما بتبدأ تفكّر في شراء حاجات جديدة في بداية كل موسم سواء كان شتاءً أو صيفاً بتهتم أكتر بإنها تعرف إيه الجديد بالنسبة لموضة الملابس، وبتنسى دايماً إن الأحذية كمان من الحاجات المهمة جداً اللي بتكمل شياكتها وأناقتها.. مش بس كده دي بتعبّر كمان عن شخصيتك يعني إذا كنتِ رقيقة أو جريئة أو عملية... 

علشان كده فكرنا نعمل لك عدداً خاصاً جداً نتكلم فيه عن شوية حاجات مهم جداً إنك تكوني عارفاها وإنتِ نازلة تشتري حذاء جديد.. كمان هنقول لكِ على أحدث صيحات الموضة في عالم الأحذية السنة دي... يلّا نشوف مع بعض.... 

اختاري الوقت اللي تشتري فيه

أهم حاجة تاخدي بالك منها وإنتِ نازلة تشتري حذاء جديد هي إنك تختاري الوقت المناسب؛ وده لأن في أوقات معينة من اليوم بتكون رجليكِ فيها منتفخة وخصوصاً بعد يوم طويل من العمل والإرهاق والتعب، علشان كده أفضل وقت تشتري فيه حذاء هو الصبح قبل ما تبدئي في أي عمل مرهق أو في يوم الإجازة.

 

 

الأحذية.. شياكة وصحة وراحة

لازم تكوني عارفة إن اختيار حذاء مناسب مهمة مش سهلة؛ لأن الحذاء لو كان مش مناسب معاكِ ممكن يسبب لك مشاكل كثيرة جداً ويديكِ شعور بعدم الراحة والثقة وإنتِ في أي مشوار.. وعلشان كده حبيت أقول لك على بعض القواعد اللي المفروض إنك تهتمي بها وإنتِ بتشتري الحذاء:

 

  • أولها إنك تختاري حذاء يكون كعبه مش عالي أوي؛ يعني يكون طوله مقبول؛ لأن الكعب العالي ممكن يسبب لك مشاكل صحية كتيرة وآلام في الظهر، مش بس كده ده كمان ممكن يديكِ إحساس بعدم الثبات والقدرة على التوازن أثناء المشي، علشان كده حاولي دايماً تدوري على حذاء يكون كعبه مناسباً ومريحاً.

 

  • المقاس المناسب من أكتر الحاجات اللي لازم تاخدي بالك منها؛ لأن الحذاء لو ضيق عليكِ أوي ممكن يعمل لك التهابات في الجلد وانتفاخ في الصوابع، وكمان بيعمل علامات في الجلد بيكون صعب جداً علاجها.. علشان كده لازم تقيسي الحذاء قبل ما تشتريه وتتأكدي إن مقاسه مضبوط ومناسب ليكِ، كمان ما تكتفيش إنك تقيسي الحذاء في رجل واحدة لكن لازم تقيسي الحذاء على الرجل اليمين والشمال؛ لأن ساعات المقاس بيختلف من رجل للتانية.

 

  • اوعي يلفت انتباهك شياكة وجمال الحذاء وتنسي تركزي في شوية تفاصيل؛ زي مثلاً إن الحذاء يكون انحناءاته مش مناسبة مع شكل رجلك؛ لأنها لو مش مناسبة مع رجلك ممكن تسبب لك آلام كتيرة في رجلك وضهرك.

 

  • خلي بالك إن يكون فيه مسافة حوالي 1 سم بين أطول صباع في رجلك وبين وش الحذاء، وكمان لازم يكون وش الحذاء عريض بقدر كافي علشان صوابعك تقدر تتحرك بحرية من غير ما تكون مقيدة.

 

  • لو كنتِ في شغل بيتطلب منك إنك تلبسي كعب عالي طول الوقت فلازم تستعملي فَرشة مريحة؛ لأن فَرشة الحذاء لما بتكون مريحة وطرية بتساعد على رفع الضغط عن الرجلين من تحت وبتخلي ضغط الجسم يتوزّع على الرجلين بشكل متساوٍ.

 

  • حاجة مهمة أوي كمان لازم تاخدي بالك منها وهي نعل الحذاء (المنطقة اللي بتلامس الأرض أثناء المشي) إنه يكون مش رقيق أو رفيع أوي؛ لأنه لو كان رفيع أوي هيتعبك جداً في المشي.

 

  • حاولي تتأكدي قبل ما تشتري الحذاء من إن جلده مرن وطري ومريح في المشي، كمان الجزء اللي قدام في الحذاء اللي بيكون فيه الصوابع لازم يكون طري ومريح، والجزء اللي من ورا لازم يكون مرن؛ لأنه لو كان ناشف أوي ممكن يسبب لك حبوب وبثور وكمان هيعلم في الرجلين.

 

  • ابعدي عن الحذاء اللي فيه أجزاء بلاستيك أو معدن؛ لأنها ممكن تعلّم في الجلد، وتسبب لك جروح كمان.

 

 

أناقتك تكتمل بنظافة حذائك

حاجة مهمة أوي لازم تاخدي بالك منها وهي إن عدم الاهتمام بنظافة الحذاء بيقلل كثيرا من قيمته، وكمان بيقلل من شياكتك ومش بس كده ده بيدي للناس انطباع بأنك شخصية مهملة، وعلشان تحتفظي بشكل حذائك جديد ونظيف لأطول وقت.. فيه شوية حاجات ممكن تعمليها زي:

 

  • إنك تحتفظي بالعلبة الخاصة بالحذاء علشان تحطي الحذاء فيها بعد كل خروجة.

 

  • لو الحذاء جلد طبيعي لازم تهتمي جداً بتنظيفه وتلميعه كل ما تحسي إنه محتاج يتنظف، لو كنتِ بتلبسيه على طول، أما لو كنتِ بتلبسيه على فترات بعيدة يبقى لازم تهتمي بتنظيفه مرة كل شهر، وممكن تخلطي كوب ميه سخنة مع معلقة خل، وتجيبي فوطة ناعمة وتبليها في الخليط وبعد كده تبدئي تلمعي بها الحذاء.

 

  • أما لو الحذاء من القطيفة أو الشمواه يبقى يُفضّل إنك تنظفيه بطريقة جافة يعني ممكن تنظفيه بفرشاة أو قطعة قماش جافة.

 

 

البساطة والرقة أكثر ما يُميّز أحذية شتاء 2010
الموضة بالنسبة للأحذية في شتاء 2010 بتميل جداً للبساطة والهدوء سواء في التصميمات أو الألوان، علشان كده بننصحك إنك تختاري الموديلات البسيطة والسهلة في اللبس.


وبالنسبة للألوان فالأسود طبعاً بيغلب على الموضة كالعادة، وكمان الكحلي الغامق والموف الغامق والنبيتي والبني بدرجاته المختلفة والسيلفر كمان موضة في شتاء 2010.


أما بالنسبة للموديلات فالموضة هي الوش المربع أو اللي واخد شكل حدوة حصان يعني بيكون فيه استدارة شويه، كمان موضة الكعب السنة دي هي الكعب المربع العريض والكعب ده بيعمل راحة واستقرار كبير أثناء المشي أكثر من الكعب الرفيع...

 

وطبعاً البوت من أهم الحاجات اللي بتميّز الشتاء والسنة دي البوت موضة جداً سواء كان قصيرا أو طويلا لغاية الركبة، وعلى فكرة البوت ده ممكن تلبسيه على فستان طويل أو على جيبة، وخدي بالك إن موضة البنطلون اللي بيدخل جوه البوت هتختفي تماما في شتاء 2010.

 

abeer2010

عبـ**ـيـ**ــر الــ**ــحـ**ـب

  • Currently 187/5 Stars.
  • 1 2 3 4 5
62 تصويتات / 1799 مشاهدة

ساحة النقاش

عدد زيارات الموقع

1,098,303