عاد التاريخ نفسه ورجع ..

وبنتبع ..

نفس السنن ورا أي واحد نتبعله ..

وفي ناس تحب تعيش خدم ..

وتموت خدم ..

وإن راح صنم ..

بتجيب صنم ..

وبتركع له ..

فرعون رجع تاني سلطانه ..

دا عينيه ودا ايديه ولسانه ..

وكمان وراه منه هامانه ..

بيشتريله وبيبيع له ..

راجع وراجعه معاه حاشيه ..

واقفة الحياة و بيقولوا ماشية ..

وإن قال علي الأبيض فوشيا

بيوافقوا و بيخافوا من زعله ..

عاره ومفيش بعدها عاره ..

واحد سايق ناس بإشارة ..

وإن حط فـ صوابعه سجارة ..

80 ايدين بتولع له ..

فرعون ومعجون شيطنة ..

والفرعنة ..

لعبة ياما مارسها ودرَّسها ودرِّسها ..

مهووس بحب السيطرة ..

وفـ الافتري ..

مناهجه عاش بالمسطرة ..

بيأسسها ..

والفرعنه عبارة عن مهنة ..

وليها نداها تندهنا ..

وليها سحرة وليها كهنة ..

وليها عرش مستني وارثها ..

ويا تبقي واحد من ناسها ..

أو من خدمها و اباليسها ..

يا فـ وشها ترمي عصايتك ..

وتبقي موسي و تخلصها ..

ياتعيش حياتك علي كيفيك ..

وتعيش زمن من تأليفك ..

وياتنسي تستني رغيفك ..

من دنيا فرعون ريسها ..

=================
كلمات الشاعر : نادر عبد الله