يا فتاح يا عليم يا رزاق يا كريم اصطبحنى وصبح الصباح اهو كل يوم نبدا يوم جديد ننظف العدة ونغسل الباب ونرش المية بالملح ونولع البخور وبرضة مفيش فايدة ايوة الحالة نايمة قوى وكل يوم يعدى بنتخنق كل اللى بعمله اشرب شاى واشخط فى اى حد يقف قدامى ابعد ياعم اركن عربيتك بعيد  يا سيدى شيل ام المكنه الصينى دى من هنا  هعمل ايه ماحنا قاعدين قاعدين لا شغله ولا مشغله  مهو من ايام مالبنوك مفلست فى امريكا يفحمها مطرح مهى قاعده واحنا كل يوم فى النازل كلا حاجه بترخص الا الخشب عمال يغلى لما خلاص الواحد قرف والمستوردين علشان ميخسروش راحوا جابوا خشب منيل لو عصرته تاخد ميه انما ايه بالكيلو واحنا نفضل نشمس الخشب ونتشمس جنه واخر المتمه ينشف ويبقى زعزوعة .

وناس تانية تلاقيها عمالة شغالة وتبيع وتشترى واحنا قاعدين .....لا ء لاء لاء متفهمونيش غلط انا مش بقر عليهم انا بس لو عاوز هلاقى الف وميه بيشتغلوا واشغلهم بس انا احب اخد كاش على الحساب ده معرفوش هى ناقصه اننا نشكك كمان 

النهارده انا مشيت صنايعى قلت له روح ارزق فى حته تانية معدش عندى غير الواد زيكو واد صغير وانا اللى مربية اهو ينظف يولع الغراية يعمل اى منكش علشان الناس تحس اننا شغالين اعمل ايه مهو وجع قلب  بس ده السوق وهى دى الدنيا الله الله الله ايه العربية النظيفة اللى بتركن دى ..

العربية ركنت ونزل منها راجل ايه هيبه كده ما شاء الله ولقيته سال الواد مسعود جارى هو محل الاسطى زوزو فين انا طبعا كنت رامى ودنى وهه قمت وقلبت المحل راسا على عقب اشى خشب واشى مسامير فى دقيقة علشان الراجل يحس اننا شغالين ؟

مساء الخير حضرتك الاسطى زوزو   قلت له فى تناكة ايوة يا باشا اهلا وسهلا وانا جوه منى عاوز اصرخ واقوله اهلا وسهلا واتفضل ويا حبيبى يا حبيبى المهم  جبت له كرسى وقعدته وبعت الواد زيكو يجيب الشاى وقلت له خير قالى انا سمعت عنك كتير وعن صنعتك النظيفة وكنت عاوز اعمل معاك شغل ؟ قلت له يااااه انت تأمرنى " اه يأمرنى انا هفضل متنك لحد امتى انا عاوز ابيع "

 المهم طلعت له الكاتالوجات وطبعا قلت اسوق النصاحة الاوضة دى انا عملتها لابن خاله عادل امام والسفرة دى عملتها لبنت المحافظ وانا اصلا معرفش اسم المحافظ ايه ودى بقى الوزير كان معدى من هنا وقف العربيه وقالى ايه التحفه دى ايه التحفه دى وكان عاوز ياخدها وانا ابدا انا كنت بايعها قلت له عاوزها استنى فى الدور  الراجل ضحك واتبسط وقالى يعنى على كده انت بتكسب كويس قلت له الحمد لله الخير كتيييييييير والحمد لله بس فين النفس اللى تصرف انا على الاقل بعمل 5 اوض فى الشهر يعنى لو حسبتها كده اممممممم ولا اقولك ربنا يبارك بقى " انا بعيط من جوة ونفسى اقوله والنبى اوضه واحده نفسى فى اوضه انا بقالى ينه معملتش رجل كرسى "

لقيت الراجل قام فز وقف وكشر عن انيابة وسحنته اتقلبت كان شويه وهيطلع من مناخيرة نار وقالى بصوت سمع الحاجه فى الدور الرابع مهواصل انا ساكن فوق الورشة قفلت السطح بالخشب وقلت اعملها قاعده فى الصيف الهوا يرد الروح..........ايه اللى بقوله ده مش وقته .

الراجل قالى بكل غيظ : ولما ربنا كارمك كده مبتدفعش اللى عليك ليه 

قلت له: عليه .. عليه لمين انا مفيش عليه حاجه لحد؟  قال لى: للدولة يا ظالم .

بصيت له وانا بدات استرجع كل الكلام اللى نخعت بيه عليه وقلت له حضضرتك ميييييين ؟

قالى  الضرائب مصلحتك اولا

.........................................

ظلام خارجى وداخلى وكل حاجة وفجأة فتحت عينى لقيت 45 عين بتبص عليه وكلهم مسهمين وفجأة لقيت  الواد زيكو بيبخ على وشى ميه ويزعق اهه فاق اهه اهه فاق اهه  والحاجه تزغرط وكلهم كانوا عاوزين يعرفوا فى ايه  بس مالوش لازمه بقى العكننة ..

 هى ناقصة.