(الناس اللى يقولوا لك)
٠••••••••••••••••••••••••••••••••••
الناس اللى يقولوا لك
عن كل الحلو فيك
قدامك يعملوا لك
البحر طحينه ليك
ويقولوا كتير فى مدحك
ما بتفرح بيه وتضحك
فى غيابك غاويه فضحك
بكلام للغير عليك
***************************
بـالـنـيَّــه الـحـقـانـيَّـه
ح تقول لى دا يبقى عيب
ده عُرف الإنسانيه
إرضاه لــ تكون غريب
ماتقولش أصلِح زمانى
أو احاول غيرها تانى
ح يقولوا عليك أنانى
ولا حد يحس بيك
الناس اللى يقولوا لك
عن كل الحلو فيك
***************************
دى الناس تلمح طريقها
تعرف إيه الأساس
تنكر مين فك ضِيقْها
وتخلِّى الراس مداس
دا حجر بيدور دواير
ماتكونش بأمره حاير
أصلك لازم تساير
وعليك أكتر ماليك
الناس اللى يقولوا لك
عن كل الحلو فيك
……………………………………………
الدكتور/خالدعبدالحميدخربوش
من ديوانى المعنون:
همّ الناس
